Նոյեմբերի 10-ին՝ ժամը 19։00-ին, Կոմիտասի անվան կամերային երաժշտության տանը կկայանա Հայաստանի պետական կամերային նվագախմբի համերգը, որի ընթացքում կհնչեն Յոհան Սեբաստյան Բախի դաշնամուրային երեք կոնցերտները։ Այս ստեղծագործությունները համարվում են բարոկկո դարաշրջանի արվեստի գլուխգործոցներ, որտեղ մենակատարի և նվագախմբի միջև ստեղծվում է կենդանի և արտահայտիչ երկխոսություն։

Համերգի մենակատարն է համաշխարհային ճանաչում ունեցող դաշնակահար Ռոբերտ Շումանի, Յոհան Սեբաստյան Բախի մրցույթների հաղթող, Թագուհի Էլիզաբեթի և Սիդնեյի միջազգային դաշնամուրային մրցույթների դափնեկիր, ՀԽՍՀ ժողովրդական արտիստ, ՀԽՍՀ պետական մրցանակի դափնեկիր, Երևանի Կոմիտասի անվան պետական կոնսերվատորիայի պրոֆեսոր Սվետլանա Նավասարդյանը։

Համերգը կղեկավարի գերմանացի դիրիժոր Ֆիլիպ Ամելունգը, ով հայտնի է իր նուրբ երաժշտական մեկնաբանություններով և Բախի ռեպերտուարի խորաթափանց մոտեցմամբ։

Դիրիժոր՝ Ֆիլիպ Ամելունգ (Գերմանիա)

Մենակատար՝ Սվետլանա Նավասարդյան, դաշնամուր

Յոհան Սեբաստյան Բախ.

- Կոնցերտ № 1 ռե մինոր, BWV 1052

- Կոնցերտ № 4 լա մաժոր, BWV 1055

- Կոնցերտ № 5 ֆա մինոր, BWV 1056 

Հուշ-համերգը նվիրված է ՀՀ արվեստի վաստակավոր գործիչ, Մենակատարների անսամբլի գեղարվեստական ղեկավար և դիրիժոր, Վագներյան ընկերության, Հայկական Բախյան, Հայկական Շեքսպիրյան և Գերմանա-ավստրիական երաժշտության բարեկամների ընկերությունների հիմնադիր և նախագահ, Կուենկայի (Էկվադոր) պետական համալսարանի պրոֆեսոր, Հայ հոգևոր երաժշտության պետական կենտրոնի տնօրեն, Երևանի կամերային նվագախմբի հիմնադիր, գեղարվեստական ղեկավար և գլխավոր դիրիժոր Զավեն Վարդանյանի ծննդյան 80-ամյակին։

Սկիզբը՝ 19։00։

Մինչև 6 տարեկան երեխաների մուտքն արգելվում է։